Út er komin hjá Veröld bókin Strákar eftir Bjarna Fritzson og Kristínu Tómasdóttur. Stundum er stuð að vera strákur en stundum er það bölvað óstuð. Hvernig á maður að vera og hvernig á maður ekki að vera?
Í þessari fróðlegu uppflettibók er fjallað um líf íslenskra stráka frá öllum mögulegum og ómögulegum hliðum: fjármál og fjölskyldan, stelpur og staðalímyndir, kynlíf og mataræði, tölvur og tilfinningar.
Hér er með öðrum orðum að finna upplýsingar um allt það helsta sem strákar eru að kljást við í sínu daglega lífi. Textinn er í senn aðgengilegur, ágengur og einlægur.
Kristín Tómasdóttir hefur um árabil unnið að æskulýðsmálum og er höfundur þriggja metsölubóka fyrir unglingsstelpur. Bjarni Fritzson hefur lokið prófi í sálfræði, auk þess að vera atvinnumaður og þjálfari í handbolta – og m.a. leikið með íslenska landsliðinu.
„Stórskemmtileg bók fyrir stráka.“ – Ari Eldjárn, grínisti
„Hrikalega skemmtileg og gagnleg bók. Skyldueign fyrir alla stráka.“ – Aron Pálmarsson, handboltastrákur
Strákar er 235 blaðsíður að lengd. Jón Ásgeir hannaði kápu. Bókin er prentuð í Odda.