Rithöfundarnir Yrsa Sigurðardóttir og Ragnar Jónasson hafa ákveðið að stofna til sérstakra glæpasagnaverðlauna sem nefnast Svartfuglinn í samvinnu við útgefanda sinn, Veröld. Verðlaunin verða veitt fyrir handrit að áður óbirtri glæpasögu og er við það miðað að sagan komi út hjá Veröld í upphafi Viku bókarinnar í apríl ár hvert. Verðlaunin nema 500.000 krónum auk hefðbundinna höfundarlauna samkvæmt rammasamningi Félags íslenskra bókaútgefenda og Rithöfundasambands Íslands. Þeim sem hlýtur glæpasagnaverðlaunin býðst enn fremur samningur við umboðsmanninn David H. Headley en tímaritið Bookseller útnefndi hann sem einn af 100 áhrifamestu mönnum breskrar bókaútgáfu árið 2015. Einnig fær sá sem ber sigur úr býtum sérstakan verðlaunagrip.
Yrsa og Ragnar skipa dómnefndina ásamt Bjarna Þorsteinssyni, útgáfustjóra Veraldar. Handitum skal skilað í þríriti til Veraldar að Víðimel 38, 107 Reykjavík, fyrir 1. janúar næstkomandi. Þau eiga að vera merkt dulnefni en rétt nafn höfundar fylgi með í lokuðu umslagi. Höfundurinn má ekki hafa gefið út glæpasögu áður. Komist dómnefndin að þeirri niðurstöðu að ekkert handrit uppfylli kröfur hennar getur hún ákveðið að veita ekki verðlaunin það ár.
Yrsa og Ragnar segjast með þessum nýju verðlaunum vilja hvetja höfunda til að spreyta sig á þessu bókmenntaformi, greiða þeim leið til útgáfu og stuðla að því að fleiri skrifi bækur á íslenskri tungu. Jafnframt vonast þau til að verðlaunin hjálpi nýjum höfundum að komast að hjá erlendum bókaforlögum.
Yrsa Sigurðardóttir sendir í haust frá sér sína þrettándu glæpasögu. Bækur hennar koma út á yfir þrjátíu tungumálum í öllum byggðum heimsálfum veraldar. Hún hefur hlotið margvísleg verðlaun fyrir glæpasögur sínar, s.s. Blóðdropann – Íslensku glæpasagnaverðlaunin, Dönsku glæpasagnaverðlaunin og Petrona-verðlaunin fyrir bestu norrænu glæpasöguna í Bretlandi.
Í haust kemur út níunda glæpasaga Ragnars Jónassonar. Bækur hans eru nú gefnar út á um tuttugu tungumálum. Verk hans hafa verið tilnefnd til fjölda verðlauna og hlaut hann Mörda-verðlaunin fyrir bestu þýddu glæpasöguna í Bretlandi í fyrra. Áður en Ragnar hóf sjálfur að senda frá sér bækur þýddi hann fjórtan glæpasögur Agöthu Christie.