Þriðja Napólí-sagan komin!

Fréttir

Þriðja Napólí-sagan komin!

Þeir sem fara og þeir sem fara hvergi er þriðja bókin í Napólí-bálki Elenu Ferrante sem fer nú sannkallaða sigurför um heiminn. Bækurnar fjórar fjalla um vinkonurnar Lilu Cerullo og Elenu Creco og flókna vináttu þeirra allt frá uppvextinum í einu af fátækari hverfum Napólí á sjötta áratugnum til fullorðinsára. Elena, sem segir söguna, fetar menntaveginn en Lila styttir sér leið um giftingu til fjár. Í bakgrunni eru hinar miklu þjóðfélagsbreytingar á seinni hluta 20. aldar sem hafa áhrif á líf þeirra og vina þeirra. Þetta eru sögur um djúpa vináttu og flóknar kenndir, umbreytingar, lífsviðhorf, æðruleysi og örvæntingu.

Þeir sem fara og þeir sem fara hvergi er þriðja bókin í þessum vinsæla bálki. Hér takast vinkonurnar á við fullorðinslífið og fara hvor í sína átt til að brjótast út úr fátækt og stöðnun; Lila sem fráskilin móðir en Elena fetar menntaveginn. Og þá reynir á hin sterku bönd sem tengja þær saman. Áður hafa komið út hjá Bjarti fyrri bækurnar tvær: Framúrskarandi vinkona og Saga af nýju ættarnafni.

Á bakvið höfundarnafnið Elena Ferrante er rithöfundur sem enginn veit hver er. Elena sagði ítölskum útgefanda sínum, bréflega, að bækurnar tali fyrir sig sjálfar og þurfi sín ekki lengur með.

Brynja Cortes Andrésdóttir þýddi úr ítölsku.


Eldri fréttir Nýrri fréttir