Út er komin hjá Veröld ný glæpasaga eftir Ragnar Jónasson, Dimma. Lögreglufulltrúinn Hulda rannsakar síðasta sakamálið sitt áður en henni er gert að hætta störfum fyrir aldurs sakir, 64 ára gömul. Ung kona, hælisleitandi frá Rússlandi, finnst látin á Vatnsleysuströnd og bendir ýmislegt til þess að hún hafi verið myrt.
Engum er hægt að treysta og enginn segir allan sannleikann. Hörmulegir atburðir úr fortíð Huldu sækja á hana og hún gerir afdrifarík mistök við rannsóknina sem hafa ófyrirsjáanlegar afleiðingar.
Ragnar Jónasson er einn fremsti spennusagnahöfundur þjóðarinnar og hefur hann vakið mikla athygli erlendis. Meðal annars sat bók hans, Snjóblinda, í efsta sæti metsölulista í Bretlandi og Ástralíu, fyrst íslenskra skáldsagna.
„Dimma heldur manni frá fyrstu blaðsíðu til þeirrar síðustu.“
– Katrín Jakobsdóttir
Dimma er 263 blaðsíður að lengd. Ragnar Helgi Ólafsson hannaði kápu en Eyjólfur Jónsson braut um. Bókin er prentuð í Odda.