Tilfinningar eru fyrir aumingja

TILNEFND TIL ÍSLENSKU BÓKMENNTAVERÐLAUNANNA!

Til að bregðast við yfirvofandi miðaldrakrísu, sem kemur ekki síst fram í eilífu tali um dren og skólplagnir, fær Halla vini sína sem öll eiga sér skrautlega fortíð til að stofna með sér metalband. Það þarf að redda mörgu en erfiðastur er alvarlegur skortur á tónlistarhæfileikum. 

Samhliða sérkennilegum hljómsveitaræfingum geisa stormar í einkalífi Höllu. Leitin að ástinni í öllum sínum myndum krefst mikilla fórna og veldur stöðugu tilfinningatjóni. 

Fyndin og grípandi en um leið sár og djúp saga um fólk sem reynir að finna fótfestu í glerhálu lífinu.

„...lýsingar á raunum hennar í ástamálum eru jafn fyndnar og raunveruleiki þeirra er sorglegur ... bókin er svo fyndin, mannlýsingar svo góðar og tíðarandavísanir svo markvissar og gegnumgangandi. ... Vel skrifuð og einstaklega fyndin samtímalýsing um nándina á netinu og einmanaleikann í raunheimum, vináttu og dren.“ Brynhildur Björnsdóttir, Fréttablaðinu

„Í bókinni fangar Kamilla tíðaranda reykvísks samtíma á kostulegan hátt en hún á ekki í nokkrum erfiðleikum með að koma auga á skondnar hliðar mannlegrar tilveru. Hún er óhrædd við að fara sínar eigin leiðir sem höfundur sem gerir hana að ferskum andblæ í íslenskum bókmenntum. Tilfinningar eru fyrir aumingja er allt í senn; meinfyndin, ljúfsár og – svo gripið sé til lýsingarorðs sem sögukonan notar óspart – „krúttuleg“ bók.“ Helga Jónsdóttir, Skáld.is

„... ég hef sjaldan hlegið jafn mikið upphátt við lestur á íslenskri bók ...Kamillu tekst þannig á beittan en einnig drepfyndinn hátt að lýsa leitinni að ástinni í Reykjavík í dag. ...  hressandi saga sem er mjög auðvelt að lesa á einu kvöldi.“ Sæunn Gísladóttir, Lestrarklefinn.is