Eftir bankahrunið og útkomu skýrslu rannsóknarnefndar Alþingis neyddust Íslendingar til að horfast í augu við nýjan veruleika þar sem hugtök á borð við spillingu, mútur og aðstöðubrask losnuðu úr viðjum þöggunar.
Í þessari afhjúpandi bók er rýnt í íslenskt samfélag og sýnt hvernig viðskipti og stjórnmál hafa verið gegnsýrð af valda- og hagsmunatengslum, spilltum embættisfærslum, pólitískum stöðuveitingum og „vel heppnuðum“ tilraunum til þess að gera almannafé að uppsprettu auðs hjá einkaaðilum. Tekin eru sláandi dæmi frá undanförnum árum en þagnarhjúpur hefur verið um sum þeirra. Jafnframt er ljósi varpað á eðli valda- og hagsmunatengsla og leitað í þeim tilgangi í smiðju ýmissa fræðimanna.
Jóhann Hauksson er einn þekktasti rannsóknarblaðamaður landsins, með víðtæka reynslu og þekkingu. Hann hlaut Blaðamannaverðlaunin árið
2010 fyrir leiðandi umfjöllun um fall ríkisstjórnarinnar og þýðingarmiklar fréttaskýringar um mikilvæg þjóðfélagsmál.