Helgi Tómasson

Saga Helga Tómassonar er ævintýri líkust, allt frá því að hann varð vitni að sýningu fyrsta ballettflokks sem steig á svið á Íslandi. Það var í Vestmannaeyjum sumarið 1947 að lítill drengur lét heillast og síðan hefur dansinn verið líf hans og ástríða. Helgi Tómasson segir sögu sína á þann einlæga og hæverska hátt sem honum er nærtækur. Hann lýsir langri leið, mótlæti og þrotlausu striti, að því marki að verða einn dáðasti ballettdansari sinnar kynslóðar, en síðar mikilsvirtur danshöfundur og loks listrænn stjórnandi eins af stórkostlegustu ballettflokkum heims.

Þorvaldur Kristinsson hlaut Íslensku bókmenntaverðlaunin árið 2008 fyrir ævisöguna Lárus Pálsson leikari. Bók hans um Helga Tómasson er heillandi saga um sársauka og gleði, fórnir og sigra manns sem notið hefur meiri viðurkenningar fyrir list sína en flestir aðrir Íslendingar.